असा "मी'' तसा "मी"...

असा "मी'' तसा "मी"

मान हृदयातला "मी"

स्वाभिमान सगळ्यांचा,

तोर्यात फडकतो "मी" . . .

ह्या प्रांतांचा "मी"

त्या देशाचा "मी"

भिन्न भिन्न लोकांच्या,

ओळखीचा चेहरा "मी" . . . 

एका पक्षाचा "मी"

दुसऱ्या संघटनेचा "मी" 

सगळ्या राजकारणात,

ठसा तयांचा उमटवितो असा "मी"

शिवबाचा "मी" 

औरंगजेबाचा "मी"

मराठी स्वराज्य राखतो,

भगव्यात रंगलो "मी" . . . 

भारताचा "मी"

सगळ्यांच्या शिरपेचात "मी"

तीन रंगांची ओळख,

अशोक चक्रासह "मी" . . .

जरी ह्यांचा "मी", जरी त्यांचा "मी"

माणसां - माणसात विखुरलेला, जातीपातीचा "मी"

मानाचा जरी होतो मुजरा मला,

तरीही एका दिवसाचा बादशहा "मी" . . . 

असा "मी" तसा "मी" 

नावाचा झेंडा "मी"

म्हणून स्वराज्याच्या तोरणावर,

सदा फडकतो "मी" . . .

- दीपक पारधे 

तुटलेली मने . . .

मनांचे खेळ असतात चालू,

त्याला भावनांचा विळखा पडतो . . . 

तुटलेली मन जोडायला कधी,

का कुणाला वेळ असतो ?

भावनेच्या पलीकडे आणि मनाच्या आड,

सगळेच दडलेले असते,

काही प्रश्नपत्रीकांमध्येच 

उत्तर लपलेले असते . . . 

व्यथा होतात निर्माण मनात.

तेव्हा अगदी संताप येतो,

एखाद्या पुढाऱ्याच्या भाषणाला जणू,

बहिर्यांचा गोतावळा जमतो . . . 

मनात पडते दरी,

तेव्हा संपून जाते सगळे,

अविश्वासाचे सावट घेवून,

तळ्याकाठी जमतात बगळे . . . 

तुटू नये मन न यावे अपंगत्व,

म्हणून काय उपाय करावे,

अपेक्षांची घागर बुडवून,

प्रीतीचे दोन थेंब पाजावे . . . 

- दीपक पारधे